Noka paralajmëron policët: Po provokuat protestuesit do shkojmë në Surrel

Deputetët e Partisë Demokratike Flamur Noka, Albana Vokshi dhe protestues të PD u përplasën me efektivë të policë të cilët në një moment u rreshtuan në rrugën e bllokuar prej tyre.

Drejtuesit e PD e kanë cilësuar rreshtimin e efektivëve një provokim dhe u kanë kërkuar të largohen.

Noka shkoi edhe më tej duke i kërkuar policëve të largohen ose destinacioni i radhës i protestës do jetë Surreli, vendbanimi i kryeministrit Rama.

“Kam vetëm këtë thirrje; largoni këta banditë me uniformë në të kundërt Surreli do jetë destinacioni i radhës i protestuesve”, tha Noka.

6 akse kryesore në vend do të jenë të paralizuara për shkak të protestës së opozitës që ka nisur në orën 17:00.

Konkretisht akset rrugore që janë bllokuar janë “Tiranë–Durrës”, pranë mbikalimit të Kamzës; “Durrës-Tiranë”, pranë mbikalimit të Shkozetit; “Kashar–Milot”, pranë kryqëzimit të Milotit; “Elbasan–Tiranë”, te rrethrrotullimi i Bradasheshit; “Durrës–Fier”, te rrethrrotullimi i Rrogozhinës dhe “Levan–Tepelenë”, te rrethrrotullimi i Levanit.