Norvegjia shkatërron Italinë 4-1 në Milano, axurrët në play-offf

Norvegjia konfirmoi formën fantastike, duke e mbyllur grupin me pikë të plota dhe duke siguruar kualifikimin e drejtpërdrejtë për në Botëror.

E udhëhequr nga ylli i Manchester City, Erling Haaland, skuadra nordike nuk pati vështirësi të përmbyste Italinë. Pjesa e parë u mbyll 1-0 pas golit të Esposito, ndërsa në fraksionin e dytë dopieta e Haaland, së bashku me golat e Nusa-s dhe Larsen, vulosën fitoren 1-4.

Me 37 gola të shënuar, 24 pikë dhe një ecuri perfekte, Norvegjia është skuadra më bindëse e kualifikueseve. Ndërkohë, Italia shpreson të sigurojë biletën për Botëror falë play-off-it.

Në Grupin D, Franca arriti një tjetër fitore, këtë herë ndaj Azerbajxhanit në transfertë me rezultatin 1-3.

Dadashov kaloi në avantazh vendasit, por brenda pjesës së parë “trikolorët” përmbysën me golat e Mateta-s dhe Akliouche-s, si dhe autogolin e Mammadaliyev.

Franca e mbyll grupin me 16 pikë në 5 ndeshje dhe kualifikohet në finalet e Kupës së Botës.

Mbrëmjen e së hënës pritet me interes dueli mes Gjermanisë dhe Sllovakisë, që kanë nga 12 pikë në Grupin A.

“Pancerat” synojnë vendin e parë për kualifikim direkt, ndërsa një humbje do t’i dërgonte në play-off – skenar që mund të ndikojë edhe për Shqipërinë, e cila mund të përballej me ta si kundërshtar i mundshëm.