“Nuk pranova ndarjen”- Dëshmia e 23-vjeçarit filipinas që vrau studenten shqiptare

23-vjeçari filipinas Mark Samson ka pranuar përpara hetuesve vrasjen e 22-vjeçares shqiptare, Ilaria Sula. Ai ka deklarar se e qëlloi ish-të dashurën pasi nuk mund të pranonte ndarjen nga ajo.

Samson ka rrëfyer se e ekzekutoi të renë në banesën e tij dhe më pas, për të fshehur krimin, trupin e saj e vendosi në një valixhe. Sipas deklaratës së tij, ai hodhi celularin e viktimës në një pusetë në Romë dhe më pas transportoi trupin me makinë drejt një zone të pyllëzuar në Poli, ku e hodhi në humnerë.

“Trupin e futa në makinën time në një valixhe dhe e çova në Poli,” ka treguar ai gjatë marrjes në pyetje nga hetuesit.

Samson dhe e reja shqiptare kishin krijuar një lidhje që kishte zgjatur rreth 1 vit, por që kishte përfunduar.

Ilaria Sula ishte raportuar e zhdukur që nga 25 marsi në Romë, ndërsa kërkimet çuan në gjetjen e trupit të saj mëngjesin e kësaj të mërkure.

Ajo u gjet në një zonë pyjore afër komunës së Polit, rreth 40 kilometra larg Romës.

Ish-i dashuri përdori telefonin e 22-vjeçares për të postuar mesazhe dhe për të krijuar iluzionin te familjarët dhe policia se ajo ishte ende gjallë. Ky veprim e vendosi Samson në qendër të hetimeve, ku tabulatet telefonike dhe gjurmët e vendndodhjes kanë ndihmuar për të zbardhur ngjarjen.

LEXONI GJITHASHTU:

• Ishte zhdukur në Romë, gjendet brenda një valixheje trupi i 22-vjeçares shqiptare
• Zbardhet vrasja e studentes shqiptare në Itali, arrestohet i dashuri filipinas