‘Nuk shkëputemi dot nga puna dy herë në ditë’, prindërit ankohen për mësimin me turne

Më të vegjlit, ata që hyjnë në klasën e parë, mbajnë në dorë lule për mësuesen, ndërsa barrën e orareve të çrregullta e mbajnë prindërit.

Pavarësisht se në klasa do të ruhet distanca, në oborr rrëmuja është e madhe.

Pas 2 orësh, turni i parë ka mbaruar mësim, është radha e turnit të dytë. Më fatlumët tani do të kthehen në shtëpi të shoqëruar nga prindërit apo gjyshërit që i presin pas portës së shkollës.

Zilja bie sërish, këtë herë për turnin e dytë.

Brenda në shkollë thuhet se ka rregull, por në oborr, lumturia e ditës së parë, por edhe malli për të përqafuar shokët e klasës, është më madhe se frika nga COVID.

Pas dere, sërish gjyshërit dhe prindërit presin të mbarojë mësimi.

Ndërrimi i turneve sjell kaos sërish në oborr. Ata që dalin, bashkohen në oborr me fëmijët që presin të hyjnë. Të çorientuar nga kjo situatë, disa prej vogëlushëve nuk i mbajnë dot lotët.

Ata që e vuajnë më shumë mësimin me turne janë prindërit, që sot janë detyruar të lënë punën për të shoqëruar fëmijët. Por, ditët e tjera do të duhet të zgjedhin mes sigurisë së vogëlushëve dhe vendit të punës.

“Shumë e vështirë është se kam edhe një vajzë të vogël”, u shpreh një grua.

“Punën nuk e lë dot dy herë në ditë”, tha një tjetër.

Më me fat janë ata që kanë gjyshërit pranë.

Dita e parë, sjell në dyert e shkollës edhe mësues në pension, që i merr malli për të përjetuar emocionet e ditës së parë.

“Kam qenë dikur mësuese dhe më intereson dita e parë dhe jam e emocionuar.

Zilja lajmëron sërish fillimin e ditës së parë të shkollës për disa, megjithëse pasdite.

Turni i katërt hyn në mësim, e sërish prindër e gjyshër presin pas dere.

Me orë të reduktuara, dhe pasiguri për vazhdimin e mësimit nesër, perëndimi i diellit shënon fundin e ditës së parë të mësimit për ta.

LEXONI GJITHASHTU:

• Ekspertja e Arsimit: Në institucionet arsimore mungon llogaridhënia, bordet nuk funksionojnë
• Ministrja Kushi: Në shkollat me turne ora mësimore zgjat 30 minuta
• Ministrja e Arsimit: 1300 nxënës më pak në klasat e para