“O do arratisesha, o do ta vrisja” – Zbardhet dëshmia e vajzës që groposi të atin

Një ngjarje e rëndë tronditi opinionin publik mëngjesin e së premtes. 50-vjeçari Pëllumb Meta, i denoncuar i humbur prej 10 ditësh nga familjarët e vet, është vrarë me armë zjarri nga e bija e tij 19-vjeçare, Hygerta Meta e cila më pas e ka groposur në oborrin e banesë.

Euronews Albania ka siguruar dëshminë e dhënë në polici nga 19-vjeçarja, e cila ka pranuar autorësinë e krimit që pretendon se e ka kryer e vetme, pas konflikteve të vazhdueshme me babanë që kërkonte ta fejonte pa dëshirën e saj.

“E vrava se donte më martonte me dikë  që nuk e doja, kishim pothuajse përditë  konflikte, më tha se fejesa ishte një punë e vendosur tashmë dhe kështu do të bëhej”, është shprehur vajza.

Ajo ka planifikuar se si mund të shpëtonte nga kjo fejesë: “kisha dy mundësi, ose do të arratisesha ose do ta vrisja”, mësohet të ketë thënë 19-vjeçarja.

“Një ditë nisëm të debatonin përsëri kur ishim në shtëpi, isha vetëm me të, nëna ishte në arë, mora pistoletën (që i ati e mbante pa leje)  dhe e qëllova. Më pas kisha frikë mos më  fusnin në burg dhe mendova të fshihja trupin e babait. Pasi e varrosa në oborrin e shtëpisë, mendova se edhe policia e besoi lajmin që ai ishte zhdukur. E kam kryer e vetme vrasjen, nuk më ndihmoi askush”, raportohet të ketë thënë e reja.