Operacion i befasishëm në Elbasan/ Sekuestrohen 3 pistoleta, 11 të shoqëruar

Një operacion i papritur i policisë u zhvillua gjatë kësaj të hëne në Elbasan, ku u shoqëruan rreth 11 persona të dyshuar për lidhje kriminale, ndërsa u sekuestruan tre pistoleta.

Burime bëjnë me dije se operacioni është zhvilluar rreth orës 15:30, në një prej lokaleve të njohura përgjatë aksit rrugor Elbasan–Ish-Metalurgjia, në fshatin Katund i Ri.

Forcat e rendit, të mbështetura nga njësi të tjera policore të ardhura nga Tirana, kanë ndërmarrë një aksion të mirëorganizuar, duke rrethuar fillimisht të gjithë zonën përreth lokalit, përpara se të ndërhynin në ambientet e brendshme të restorantit, ku dyshohej se ndodheshin eksponentët kriminalë.

Informacionet e siguruara në rrugë operative çuan në ndërhyrjen e menjëhershme të forcave speciale, të cilat neutralizuan dhe arrestuan disa persona të dyshuar.

Operacioni është cilësuar si një nga më të rëndësishmit e zhvilluar kohët e fundit në Elbasan, një qytet që prej vitesh përballet me prani të lartë të grupeve kriminale.

Deri më tani, autoritetet nuk kanë dhënë detaje zyrtare mbi identitetin e të arrestuarve apo akuzat konkrete ndaj tyre, ndërsa pritet që në orët në vijim Policia e Shtetit të dalë me një njoftim zyrtar.

LEXONI GJITHASHTU:

• Përplasje në aksionin policor, detaje nga operacioni me 11 të arrestuar në Elbasan
• I morën me dhunë mbi 5 mijë euro 27-vjeçarit në rrugë, arrestohen dy të rinj në Vorë
• Policia e Tiranës nis aksionin për ndalimin e monopatinave, qytetarët kundërshtojnë