Kryetarja e Kuvendit, Elisa Spiropali pa reaguar pas publikimit të Opinionit të Komisionit të Venecias lidhur me mandatin e deputetes socialiste Olta Xhaçka.
Spiropali shprehet se “sot morën përgjigje edhe të gjitha akuzat, shpifjet dhe propaganda me të pavërteta” kundër qëndrimit të Kuvendit ndaj kësaj çështjeje.
“Besoj tani është e qartë për të gjithë se qëndrimi ynë lidhur me procesin e trajtimit të mandatit të deputetes Olta Xhaçka nuk ishte një qëndrim as politik, as partiak, por një qëndrim kushtetues që lidhet me sovranitetin e paprekshëm të Kuvendit!
Gjykata Kushtetuese ka kërkuar që deputetët të votojnë në një mënyrë të caktuar dhe kjo nga ne është lexuar jo thjesht si ndërhyrje në pavarësinë e Kuvendit, por në radhë të parë si një vendim i pazbatueshëm për shkak të pamundësisë së një rregulli që i imponon deputetit se si të votojë!
Sot morën përgjigje edhe të gjitha akuzat, shpifjet dhe propaganda me të pavërteta kundër këtij qëndrimi, por si Kryetare Kuvendi ndjehem e lehtësuar dhe për këtë falenderoj Komisionin e Venecias që e shqyrtoi me shpejtësi dhe seriozitet maksimal kërkesën time.
Kam bindjen se ky opinion i drejtë do t’u shërbejë të gjitha palëve dhe institucioneve për reflektim në zgjidhjen drejt të çështjeve në lidhje me papajtueshmërinë e mandatit të deputetit në të ardhmen”, shprehet Spiropali.
Në opinionin e publikuar Komisioni i Venecias nuk ka marrë një qëndrim të drejtpërdrejtë lidhur me vendimet specifike të Gjykatës Kushtetuese për rastin e Xhaçkës, por ka ofruar një analizë të përgjithshme mbi mënyrën se si duhet trajtuar çështja e papajtueshmërisë së mandatit të saj në kuadrin kushtetues shqiptar. Sipas Komisionit, Parlamenti duhet të respektojë vendimet e Gjykatës Kushtetuese, duke vepruar në përputhje me ato vendime pa e kushtëzuar këtë me vullnetin e shumicës parlamentare.
LEXONI GJITHASHTU:
- Opinionin i “Venecias” për Olta Xhaçkën, reagon Gazment Bardhi
- Komisioni i Venecias bën publik opinionin lidhur me mandatin e Olta Xhaçkës
