“Opozita duhet…”-Murrizi: 1 milionë shqiptarë janë larguar gjatë qeverisjes së Ramës

Ish-deputeti i Partisë Demokratike, Myslym Murrizi, është shprehur se rreth 1 milionë shqiptarë janë larguar gjatë qeverisjes së kryeministrit Edi Rama.

Komentet Murrizi i bëri në “Euronews Albania”, ku tha se opozita duhet të krijojë një platformë të pëlqyer nga publiku, për të mbrojtur qytetarët nga arroganca e qeverisë.

Ai tha gjithashtu se “Rithemelimi” nuk duhet të lëvizë nga parimet e qendrës së djathtë, por të sillet si një parti konservatore.

“Unë nuk i përkas njerëzve që bëjnë llogari me laps në dorë dhe kam si qëllim në vetëvete pushtetin. Kam punuar në 34 vite 5 vite gjithsej në administratë, ushtar i vogël i Perandorisë së madhe.

Nga 97 jam në opozitë me të gjitha qeveritë, përfshi edhe qeverinë Berisha. Problemi është çfarë u ofron qytetarëve, sa mundësi ke të shndërrohesh në subjekt të vlefshëm politik, për të mbrojtur qytetarët që dhunohen nga ky pushtet, që degdisën nga sytë këmbët 1 milionë shqiptarë nga ardhja në pushtet e Ramës e deri më sot, të jesh ofertë e pëlqyer për qytetarët shqiptarë.

Nuk i lëpihem njeriu për të qenë në Kuvend. Kam qenë dy herë në Kuvend. Unë shkova te “Rithemelimi” sepse thanë që do jemi parti konservatore, nuk jemi konservatore. S’duhet të bien në delirin e madhështisë për të thënë që do i bëjnë mirë gjithë shqiptarëve, duke devijuar nga parimet e qendrës së djathtë”, tha Murrizi.