Osmani reagon pas pezullimit të Dialogut nga SHBA: Amerika, busull për të ardhmen

Presidentja e Republikës së Kosovës, Vjosa Osmani, ka reaguar pas vendimit të Shteteve të Bashkuara të Amerikës për pezullimin pa afat të Dialogut Strategjik me Kosovën.

Në një deklaratë publike, Osmani shpreh keqardhjen dhe shqetësimin e saj të thellë për këtë vendim, duke e cilësuar Dialogun Strategjik si një ndër mekanizmat më të rëndësishëm të bashkëpunimit ndërmjet dy vendeve.

“Republika e Kosovës është ndërtuar mbi themelet e miqësisë së pathyeshme me Shtetet e Bashkuara të Amerikës. Ky raport nuk është vetëm diplomatik, por pjesë ekzistenciale e identitetit tonë shtetëror dhe kombëtar,” thuhet në deklaratën e Presidencës.

Osmani thekson se ky dialog u iniciua nga vetë ajo në vitin 2021 dhe u konkretizua me konfirmimin përfundimtar në janar të vitit 2025, pas një sërë angazhimesh dhe takimesh të nivelit të lartë me Departamentin Amerikan të Shtetit.

Ajo shton se aleanca me SHBA-të është një çështje strategjike që kërkon unitet të gjerë politik dhe përkushtim të përbashkët nga të gjitha institucionet dhe faktorët në vend.

“Siguria e Republikës së Kosovës është fuqishëm e lidhur me mbështetjen e SHBA-ve. Prandaj, secili duhet ta marrë me seriozitet dhe përgjegjësi maksimale ruajtjen e kësaj aleance të shenjtë,” nënvizon Osmani.