Padia e Macron ndaj Candace Owens për shpifje mbi identitetin e Brigitte Macron

Presidenti francez Emmanuel Macron dhe gruaja e tij, Brigitte Macron, kanë depozituar një padi për shpifje në Shtetet e Bashkuara të Amerikës kundër influencueses amerikane Candace Owens. Padia lidhet me përhapjen e një lajmi të rremë që pretendon se Brigitte Macron “ka lindur burrë” një gënjeshtër që Owens e ka promovuar gjerësisht përmes videove të saj.

Kjo tezë e rreme, e cila ka qarkulluar në mediat sociale në Francë që nga zgjedhjet presidenciale të vitit 2017, u përhap masivisht jashtë vendit, duke gjetur terren të veçantë në SHBA pas videos së publikuar nga Owens në mars 2024. Prej janarit 2025, influencuesja amerikane ka vazhduar ta promovojë këtë histori në një seri përmbajtjesh të titulluara “Becoming Brigitte”.

Sipas avokatëve të çiftit Macron, Candace Owens ka qenë e vetëdijshme për pavërtetësinë e këtyre pretendimeve dhe ka refuzuar çdo kërkesë për korrigjim, duke e përdorur këtë “fushatë shpifëse” për të fituar vëmendje dhe përfitime financiare. Influencuesja ka aktualisht 6.9 milionë ndjekës në X (Twitter) dhe 4.7 milionë në YouTube, çka i ka dhënë një përhapje të gjerë lajmit të rremë.

Lajmi i rremë, i cili është përhapur edhe nga teoricienë konspiracioni, skepticë të Covid-it dhe grupe ekstremiste në Francë, pretendon se Brigitte Macron, me mbiemrin e lindjes Tronier, nuk ka ekzistuar ndonjëherë si grua, por se identitetin e saj e ka marrë vëllai Jean-Michel pas një ndërhyrjeje për ndryshim gjinie.

Në shtator të vitit të kaluar, dy gra që kishin ndarë këtë lajm të rremë, Natasha Ray dhe Amadine Roy, u dënuan nga gjykatat franceze me kompensime financiare për Brigitte Macron dhe Jean-Michel Tronier. Megjithatë, më 10 korrik, ato u liruan nga disa nga akuzat në një shkallë të dytë.