Pamje apokaliptike në Islandë, llava e vullkanit merr përpara shtëpitë

Shpërthimi i një vullkani në Islandë, për herë të dytë brenda një muaji, ka bërë që llava të marrë përpara dhe të djegë banesat në qytetin e peshkimit Grindavík, në jugperëndim të vendit.

Dy kratere u formuan pranë qytetit të dielën pas një rritje të aktivitetit sizmik që bëri që autoritetet të evakuonin komunitetin një ditë më parë.

Shpërthimi i parë i vullkanit filloi në orën 8 të mëngjesit kur një çarje u hap në tokë rreth 450 metra larg qytetit.

Barrierat mbrojtëse prej dheu dhe shkëmbi e shtynë llavën larg zonave të banuara.

Megjithatë, një çarje e dytë u krijua më pas shumë pranë qytetit, duke bërë që llava të përfshinte banesat.

Të paktën tre shtëpi janë përfshirë nga zjarri, treguan imazhet e drejtpërdrejta nga transmetuesi televiziv RUV.

“Në një fshat të vogël si ky, ne jemi si një familje, të gjithë e njohim njëri-tjetrin – është tragjike ta shohësh këtë”, tha një banor lokal, Sveinn Ari Gudjonsson, për Agence France-Presse.

“Është joreale, është si të shikosh një film”, shtoi 55-vjeçari, i cili punon në industrinë e peshkimit.

LEXONI GJITHASHTU:

• 11 alpinistë të vdekur e dhjetëra të zhdukur nga shpërthimi i vullkanit në Indonezi
• Vullkani kërcënon Islandën, evakuohen banorët. Lejohen të marrin sendet personale