Në fundjavë qyteti i Gjirokastrës mirëpriti organizimin e edicionit të  5-të, të Panairit Kombëtar të Artizanatit. Eventi “Kult-Art 2024” i përngjasonte një feste të traditës ku u shpalosën vlerat e kulturës sonë popullore.

Rreth 60 artizanë të ardhur nga 20 qytete të vendit prezantuan punët e realizuara me dorë në skalitje guri, drugdhendje, tekstil tradicional, tezgjah, kulinarin karakteristike, etj.

“Unë vij nga Saranda  dhe është e disata herë që marr pjesë  në Panairin e  Gjirokastrës dhe pjesëmarrja duket e ngrohtë  dhe e bukur, ne vijmë me punimet tona artizanale me gurë natyralë, motive të cilat ne i sajojmë vet dhe  i krijojmë vetë në bazë të fantazisë sonë dhe kërkesave të tregut”, tha një pjesëmarrëse.

“Vij nga qyteti i Vlorës dhe këtu prezantoj punimet e dorës-Mendoni se gjëra të tilla  janë të mira për organizimin e turizmit ?Po janë shumë të mira për turistët që vijnë, punimet e dorës kanë shumë vlerë”, tha një artizane.

Pjesëmarrës në “Kult-Art 2024” ishin edhe mjeshtra artizanë që transmetojnë në breza vlerat e traditës dhe trashëgimisë kulturore

“Pavarësisht se profesioni im është mësuese nuk e humbas traditën e familjes që nga gjyshja, stërgjyshja ime të bëjmë punë artizanale, Korça shquhet për traditat  e punimit të dorës, të artit të dorës, për qilimat e saj, për velenxat” tha një artizane

Panairi Kombëtar i Artizanatit tërhoqi vëmendjen e turistëve ,të cilët punimet karakteristike i preferojnë si suvenire nga udhëtimi në vendin tonë.

“Këtu është traditë që kush e ka ruajtur dhe tek unë vijnë vazhdimisht  turistët, të adresuar kudo që venë në qoftë se do punime druri , të punuara, të gdhendura  me dorë  mund të vish në Fier ka punime nga më të ndryshmet  dhe aty e shikojnë  edhe tavolinën e punës ,e shikojnë gjithçka që bëhet me dorë”, tha një pjesëmarrëse.

Përgjatë verës në Gjirokastër po zhvillohen aktivitete të shumta kulturore në shërbim të zhvillimit të turizmit.