Shkrimtari Ben Blushi sjell për lexuesin librin e tij më të ri “Parajsa Artificiale”. Botimi i këtij libri vjen një vit pas “Komplotit”, dhe lexuesit mund ta marrin atë në Panairin e Librit në Tiranë në 13 deri në 17 nëntor, dhe në të gjitha libraritë e Shqipërisë dhe Kosovës.
Njoftimin për prurjen e re letrare e ka bërë vetë Blushi përmes faqes në Facebook. Ai e cilëson romanin, pothuajse një eksperiment letrar, i cili nuk ka përshkrime, por ka vetëm dialogë.
“Romani nuk tregon pothuajse asnjëherë çfarë mendojnë personazhet, çfarë kanë veshur, ku kanë shkuar a si është koha, por tregon vetëm çfarë i thonë ata njëri-tjetrit. Prandaj Parajsa Artificiale është një dialog mes dy njerëzve. Një bisedë që zgjat nga mëngjesi deri në mbrëmje, mes dy personazheve, një burrë në moshë të mesme dhe një vajzë sa gjysma e moshës së tij, të cilët kanë një marrëdhënie dashurie”, tregon Blushi.
Krijimtaria letrare e Blushit është e mbushur me një sërë botimesh, ku spikasin “Të jetosh në Ishull”, “Otello, Arapi i Vlorës”, “Shqipëria”, “Kandidati” dhe “41 sekrete”.
LEXONI GJITHASHTU:
- Rrëfim dhe debat për “Komplotin” – Ben Blushi: Rreziku që kemi ne është demografia
- Ben Blushi: A mund të jetë Izraeli anëtar i NATO-s?
