Botërori 2026, rriten mashtrimet online ndaj tifozëve, ekspertët: Mijëra faqe të rreme për vjedhje të dhënash

Ndërsa tifozët në mbarë botën presin fillimin e Kupës së Botës 2026, ekspertët e sigurisë kibernetike paralajmërojnë se kriminelët online kanë nisur tashmë fushata mashtruese për të vjedhur të dhëna personale dhe financiare.

Sipas kompanive të sigurisë kibernetike “Fortinet” dhe “Check Point”, janë identifikuar mijëra faqe interneti të lidhura me Botërorin, të krijuara për të imituar faqet zyrtare të FIFA-s apo dyqane online të rreme.

Në total, nga janari deri në maj të këtij viti janë regjistruar rreth 13 mijë faqe interneti me tematikë “Botërori 2026”, ku disa prej tyre janë klasifikuar si dashakeqe dhe të rrezikshme për përdoruesit.

Qëllimi i këtyre faqeve është të mashtrojnë qytetarët për të marrë të dhëna sensitive si numra kartash krediti, informacion personal dhe kredenciale hyrjeje, shpesh duke ofruar bileta false apo shërbime të rreme.

Paralelisht, kriminelët kanë krijuar edhe rreth 1.700 profile të rreme në rrjete sociale si Facebook dhe Instagram, ku publikojnë njoftime për punë të rreme të lidhura me organizimin e turneut, përfshirë logjistikën, akomodimin dhe shërbimet mediatike.

Gjithashtu, janë identifikuar edhe faqe dhe lidhje të rreme që premtojnë transmetim online të ndeshjeve, të përdorura për të tërhequr tifozët dhe për t’i ekspozuar ndaj mashtrimeve.

Autoritetet dhe ekspertët këshillojnë përdoruesit të verifikojnë gjithmonë burimin e faqeve, domain-in dhe adresat e email-it përpara çdo klikimi apo transaksioni online.