PD mbyll fushatën në Tiranë, Basha: Të dielën rimarrim Shqipërinë, me fitoren më të thellë në 30 vite

Partia Demokratike mbylli sot fushatën elektorale për zgjedhjet e 25 prillit me një miting në sheshin ‘Nënë Tereza’ në kryeqytet.

Kreu i Partisë Demokratike Lulzim Basha në një fjalim mbajtur para mbështetësve të tij teksa kishte hipur mbi një makinë në mes të sheshit, u shpreh se entuziazmin dhe besimin për fitoren e thelle e kishte parë në çdo fshat e qytet përgjatë muajit të fushatës.

Kreu i PD bëri thirrje që të dielën të votohen numri 9, në mënyrë që Shqipëria t’u rikthehet shqiptarëve, duke u çliruar nga ata që sipas tij, i kanë skllavëruar për të mbushur xhepat e tyre.

“Dita e diel është dita e çlirimit për të gjithë ju, për të gjithë rrogëtarët e dhunuar nga shteti, që trajtohen si skllevër për të mbushur xhepat e tyre. Ejani dhe ju bëhuni pjesë e bashkimit; mësues, mjekë, punonjës të ndershëm të policisë së shtetit që më keni thënë me fjalë, me sy, me gjeste: ‘na ka ardhur në majë të hundës’, të dielën largoheni me votë të keqen”, tha kreu i PD.

Sipas z. Basha, PD do të marrë fitoren më të thellë në 30 vjet për fëmijët që janë e ardhmja e vendit, për nënat dhe baballarët për të rinjtë, të cilat siç tha e duan dhe do ta kenë vendin në BE.

19:03 – Mitingu ishte parashikuar të niste rreth orës 19:00, por edhe pse mbështetës të shumtë të PD janë mbledhur në shesh, kryedemokrati Basha ende nuk ka mbërritur.

Kreu i PD kishte sot një axhendë të ngjeshur, duke nisur me takimet përmbyllëse nga Shkodra, Lezha, Elbasani dhe që mbyllet me mitingun e fundit të fushatës në orën 19:00 në kryeqytet.

Gazetari i Euronews Albania Renaldo Salianji raportoi nga sheshi ‘Nënë Tereza’ se strategjia është parashikuar e njëjtë me mitingun hapës, ku qytetarët kanë mbërritur me makina në këtë shesh, ku edhe mendohet të qëndrojnë, ndërsa kreu i PD do të mbajë një fjalim mbi një makinë, siç ka bërë gjatë gjithë kësaj fushate.