Partnerët e koalicionit refuzojnë dorëheqjen e Zaev si kryeministër i RMV-së

Partitë e koalicionit qeveritar në Maqedoninë e Veriut kanë thënë se nuk e pranojnë dorëheqjen e kryeministrit Zoran Zaev.

Paraditen e parë si i vetë-shkarkuar, Zoran Zaev e ka kaluar në një sërë takimesh me partitë e koalicionit qeverisës.

Vendim i tij për t’u tërhequr nga kryesimi i qeverisë, por edhe i Lidhjes Social-demokrate, është refuzuar njëzëri nga partnerët, mes tyre edhe partitë shqiptare Bashkimi Demokratik për Integrim (BDI), si dhe Lëvizja Besa.

Zëvendëskryeministri i vendit, Artan Grubi, përfaqësues i BDI-së, deklaroi e të gjithë aleatët njëzëri janë shprehur se prononcimi i mbrëmshëm i kryeministrit Zaev për dorëheqje ka qenë i nxituar.

Prandaj, ata si aleatë i kanë kërkuar të mos japë dorëheqjen, sepse sipas tij, këto zgjedhje nuk kanë të bëjnë me mazhorancën parlamentare.

Ministri i Bujqësisë dhe njëherazi edhe sekretar i Lëvizjes Besa, Arianit Hoxha, pas takimit me aleatët qeveritarë, tha se zgjedhjet e parakohshme parlamentare do të ishin të gabuara.

Ai tha se kjo mazhorancë ka marrë një mandat të qartë për të vazhduar qeverisjen 4-vjeçare.

Sipas Hoxhës, shkuarja në zgjedhje të parakohshme në këtë moment do të ishte një katastrofë për vendin. Ai e cilësoi të nxituar prononcimin e kryeministrit Zaev për dorëheqje, pa u konsultuar më herët me partitë e koalicionit.

Po ashtu gjatë orëve të mbrëmjes, një deklaratë e kabinetit ka konfirmuar se qeveria është e qëndrueshme dhe në krye të detyrës.

LEXONI GJITHASHTU: 

• Dorëheqja e Zaev, paqartësi në skenën politike në RMV
• Dorëheqja e Zaev dëmton ‘Open Balkan’ shprehen analistët