Pas protestës Partia Demokratike deklaratë: Dënojmë ndërhyrjen e Policisë, u cënua e drejta për tubim

Partia Demokratike ka reaguar pas protestës kombëtare të 20 shkurtit, duke akuzuar Policinë për përdorim të tepruar force dhe sulm ndaj selisë së saj.

Në një deklaratë zyrtare, Partia Demokratike e Shqipërisë dënoi hedhjen e gazit lotsjellës në ambientet e partisë dhe e cilësoi ndërhyrjen si dhunë të papranueshme ndaj një proteste që, sipas saj, ishte paqësore.

Demokratët gjithashtu pretenduan se përdorimi i gazit ka ndikuar edhe në ndërprerjen e faljes së besimtarëve myslimanë në muajin e Ramazanit.

Deklarata e plotë e Partisë Demokratike:

Sasi të mëdha gazi lotsjellës janë hedhur në oborrin, mjediset dhe deri te zyrat e drejtuesve të Partisë Demokratike, forca kryesore e opozitës, pak minuta pas protestës kombëtare të 20 shkurtit, e organizuar në bashkëpunim me një grup intelektualësh të pavarur, nën siglën e Forumit të Dialogut Qytetar, në përkujtim të rrëzimit të shtatores së diktatorit Enver Hoxha dhe revoltës për skandalet korruptive të qeverisë Rama.

Forcat e Policisë kanë sulmuar selinë e forcës kryesore të opozitës pas një proteste paqësore, e disata në dy muajt e fundit, duke sjellë kaos, të lënduar dhe të plagosur.
Gazi lotsjellës ka ndikuar dhe ndërprerë dhe faljen e besimtarëve myslimanë të cilët janë në ditën e të tretë të muajit të Ramazanit.

Raportohen disa të plagosur në anën e protestuesve, një akt i paralajmëruar nga deklarata e policisë sot, e cila shmangu përgjegjësinë duke thënë se nuk e garantonte protestën e sotme, duke shpërfillur kështu një prerogativë kushtetuese.

Partia Demokratike dënon me forcë dhunën e përdorur nga narkopolicia, plagosjet me plumba gome, përdorimin e gazit lotsjellës dhe mosrepektimin e së drejtës kushteteuse për protestë.
Partia Demokratike mban përgjegjës direkt drejtorin e Policisë të lidhur me bandat kriminale, ministren e Brendshme dhe Kryeministrin Rama, urdhri i të cilit qëndron pas kësaj dhune të pashembullt policore dhe politike.