Pas spektaklit ndaj Inter-it, Juventusi përgatitet për debutimin me Dortmundin

Pas një fitoreje spektakolare 4-3 në “Derbin e Italisë” kundër Inter-it, Juventusi i Igor Tudor-it përballet menjëherë me një tjetër sfidë të madhe: debutimin në fazën e grupeve të Champions League kundër Borussia Dortmund.

Ndeshja e parë do të luhet të martën në mbrëmje në “Allianz Stadium”, ku bardhezinjtë do të kërkojnë të konfirmojnë formën e mirë që po kalojnë. Trajneri kroat po mendon për disa ndryshime në formacionin titullar: Kambiaso rikthehet nga minuta e parë pas pezullimit në kampionat, ndërsa Dejvid pritet të zëvendësojë Vlahoviç në repartin ofensiv. Mbetet në dyshim gjendja fizike e Konseisaos, ndërsa Bremer mund të pushohet për të menaxhuar ngarkesën pas rikuperimit nga një mungesë e gjatë sezonin e kaluar.

“Nuk kemi kohë për të festuar,” deklaroi Tudor në konferencën për shtyp. “Pas dy ditësh duhet të jemi gati për një tjetër ndeshje shumë të rëndësishme. Me Inter-in nuk ishim në nivelin më të mirë, por fituam dhe kjo është shenjë e karakterit të skuadrës. Dortmund është një kundërshtar i fortë, i organizuar dhe me lojtarë cilësorë. Do të jetë një sfidë e vështirë, por gjithashtu emocionuese, sepse luajmë në shtëpi, në Champions.”

Tudor theksoi rëndësinë e menaxhimit të skuadrës dhe vendimeve taktike: “Do të shohim nesër për Konseisaon. Duhet të zgjedhim me kujdes sepse në këtë nivel, çdo detaj mund të bëjë diferencën. Champions-i ka ritëm dhe cilësi tjetër, skuadrat luajnë më hapur, por janë edhe më kërkuese.”

Përkrah trajnerit foli edhe kapiteni Manuel Lokateli, i cili ndau emocionet e skuadrës para debutimit: “Të dëgjosh himnin e Champions-it në Torino është gjithmonë diçka speciale. Fitorja me Inter-in na ka dhënë shumë moral, edhe pse e dimë që duhet të përmirësohemi në mbrojtje. Ndaj Dortmund-it duhet të jemi agresivë dhe të qëndrojmë vetvetja.”

Lokateli u ndal edhe te momenti kyç i sezonit të kaluar, kur një penallti ndaj Venezia-s i dha Juventusit kualifikimin në Champions: “Ishte një moment i madh, por suksesi ishte fryt i gjithë grupit. Sivjet jemi më të bashkuar dhe kjo është forca jonë.”

Në një atmosferë entuziazmi dhe përgatitjeje intensive, Juventusi synon të nisë me këmbë të mbarë rrugëtimin në Ligën e Kampionëve. Dueli ndaj Borussia Dortmund konsiderohet si testi i parë serioz evropian për epokën Tudor.