PD hedh hapin drejt bashkimit, pritet heqja e dyerve të blinduara në seli

Partia Demokratike ka hedhur hapin e parë të rrugës drejt bashkimit. Pas mbledhjes së kryesisë një natë më parë, do të hiqen dyert e blinduara në selinë blu, të cilat u vendosën përpara protestës së 8 janarit të organizuar nga Sali Berisha.

Edhe ky i fundit është i gatshëm për dialog pas ftesës, por njeh vetëm grupin parlamentar dhe jo kryesinë e partisë për të cilën thotë se e ka shkarkuar kuvendi i 11 dhjetorit.

“PD është e hapur dhe vullnet të plotë për të diskutuar, për të debatuar me çdo anëtar të saj cilitdoqoftë ai. Jemi të hapur të bëjmë gjithçka për garantimin e votës së lirë dhe bashkimin rreth votës së votës”, tha Sali Berisha.

Kundër Bashës dhe Berishës, Grida Duma thotë se bashkimi nuk mund të kërkohet me kushte.

“Nuk mund të ketë kushte kur kërkojmë bashkim. Ka vetëm negociatë, bisedë, rënie dakord dhe pas asaj mund të kemi rrethanat në të cilat mund të realizohet bashkimi”, shprehet deputetja demokrate.

PD ka ftuar për bisedime grupin e Sali Berishës, me qëllim kryesor bashkimin e partisë, ndërsa ka njoftuar edhe ngritjen e një grupi pune me pjesëmarrjen e anëtarëve të kryesisë, grupit parlamentar dhe kolegjit të kryetarëve. Kryesia e PD i kërkon grupit të Rithemelimit që të mos mbledhë Kuvendin Kombëtar të 30 prillit.

LEXONI GJITHASHTU:

• PD projektrezolutë me 10 pika për zgjidhjen e krizës së çmimeve
• Bushati kërkon heqjen e dyerve të blinduara në PD: Hapi i parë për bashkimin