PD nënshkruan marrëveshjen e koalicionit me PBDNJ-në për zgjedhjet lokale

Është firmosur këtë të mërkurë marrëveshja e koalicionit për zgjedhjet lokale mes Partisë Demokratike dhe Partisë Bashkimi për të Drejtat e Njeriut, PBDNJ.

Në fjalën e mbajtur gjatë takimit me kreun e PBDNJ-së Vangjel Dule, kreu i PD-së Sali Berisha, theksoi se kjo marrëveshje është një bashkim i forcave për tu përballur dhe rrëzuar rregjimin monist të kryeministrit Rama.

Sipas marrëveshjes, PD pritet t’i jap PBDNJ-së përcaktimin e kandidatëve për bashkinë e Himarës, Finiqit dhe Dropullit.

“Shpreh kënaqësinë time dhe të PD për këtë marrëveshje me një aleat të hershëm të PD, me të cilin ne vendosim të bëjmë një betejë të përbashkët kundër monizmit të plotë, të vendosur nga regjimi më i korruptuar në Europë dhe botë, regjimi i Edi Ramës.

Përmbysja e këtij monizmi është përparësi absolute e çdo qytetari të lirë, e çdo opozitari dhe në këtë kontekst, ne së bashku me PBDNJ, OMONIA-n, bashkojmë forcat me bindjen se me 14 maj do i japim një goditje fatale sistemit monist.

Nga ana tjetër, ne synojmë që t’ju kthejmë bashkitë qytetarëve shqiptarë. T’i kthejmë bashkitë në shtëpitë e përbashkëta të qytetarëve shqiptarë. Qytetarët e parë të këtyre bashkive të kenë vetëdijen e plotë, përgjegjësinë e plotë, gatishmërinë e plotë për të funksionuar si shërbëtorë të këtyre qytetarëve. Për të përdorur në mënyrën më transparente dhe të ndershme të gjitha burimet njerëzore dhe materiale, financiare, të bashkisë, për të shfrytëzuar të gjitha potencialet e mëdha që çdo bashki ka sot në Shqipëri, së pari në interesin më të mirë të qytetarëve të atyre bashkive.

Unë, duke falënderuar zotin Dule për mirëkuptimin dhe marrëveshjen që firmosëm, shpreh bindjen se kemi shënuar një hap shumë të rëndësishëm në realizimin e objektivave tona të përbashkëta”, tha Berisha.

LEXO GJITHASHTU:

• Zbardhet marrëveshja e Berishës me Vangjel Dulen, cilat bashki i jepen PBDNJ-së
• Skandali në SHBA/ Berisha: Gjykata amerikane urdhëroi hetimin e Ramës