Përdhunimi i 26-vjeçares në Vlorë, reagon Avokati i Popullit

Avokati i Popullit ka përcjellë me shqetësim ngjarjen e ditëve të fundit të ndodhur në qytetin e Vlorës, ku është shënuar rasti i rëndë i përdhunimit të një vajze 26 vjeçare.

Në një njoftim për mediat Avokati i Popullit thotë se kjo është një ngjarje shumë e rëndë ndaj së cilës duhet të ketë një reagim të gjerë qytetar dhe reflektim të thellë publik.

Avokati i Popullit i inkurajon organet ligjzbatuese që ta zbardhin me përparësi rastin dhe të ndërmarrin hetime të shpejta dhe sa më efektive për vënien para përgjegjësisë të personave që e shkaktuan këtë ngjarje të dënueshme.

Gjithashtu Avokati ka reaguar dhe për kërcënimin që i është bërë gazetares Afrovita Hysaj, e cila ka raportuar mbi ngjarjen e rëndë.

“Ndërkohë, sikurse është bërë me dije në opinionin publik, të tjera incidente janë shënuar në lidhje me këtë rast, që përfshijnë përdorimin e dhunës verbale, gjuhës denigruese dhe kërcënimit për jetën drejtuar gazetares Afrovita Hysaj, e cila ka raportuar mbi ngjarjen e rëndë.

Avokati i Popullit, dënon ashpër çdo formë që cenon lirinë e shprehjes, të cilën nuk e konsideron një privilegj por një të drejtë themelore.

Sulme të tilla në një shoqëri demokratike janë të pajustifikuara dhe cënojnë ndër të tjera kurajon profesionale për gjurmimin e së vërtetë

Në sferën e lirisë së shprehjes, Avokati i Popullit është i angazhuar për të siguruar që kjo e drejtë themelore të mbetet e pacënuar, duke i inkurajuar të gjithë profesionistët e medias ta sfidojnë padrejtësinë dhe t’i japin zë mbrojtjes së të vërtetës”-njofton Avokati.

LEXONI GJITHASHTU: 

• Berisha paraqet kërkesën për përjashtimin e gjyqtares, kush pritet ta shqyrtojë
• Macron: Një ndërhyrje masive tokësore në Gaza do të ishte një gabim për Izraelin