Përgatitjet për 14 majin, kush janë kandidatët që do nxjerrë në garë PD e Alibeajt

Tashmë nuk ka më dilema, në zgjedhjet e 14 majit do të ketë minimalisht nga dy kandidatë të opozitës përballë kandidatëve të mazhorancës socialiste.

Konfirmimi erdhi pak ditë më parë nga Enkelejd Alibeaj, i cili u shpreh se Partia Demokratike që njihet nga gjykata dhe KQZ do të çojë kandidatët e saj në zgjedhjet e ardhshme lokale.

Në të gjitha bashkitë, mbështetësit e Alibeajt dhe Bashës në Partinë Demokratike kanë nisur një proces riorganizimi për të gjetur kandidatët që do të garojnë në zgjedhje.

Deri më tani vetëm një kandidat ka dalë publikisht duke shpallur kandidaturën. Agron Kapllanaj, ish-kryetar i Bashkisë Mallakastër, shkroi në rrjetet sociale se do të garojë në 14 maj për t’ia kthyer këtë bashki demokratëve.

Emrin e Kapllanajt, por edhe të disa kandidatëve të tjerë që përfliten, i komentoi Berisha në konferencën me gazetarët, ku nuk i kurseu akuzat.

“Partia Demokratike del me një kandidat, çdo kandidat tjetër që del, del në emër të Edi Ramës për të dëmtuar PD, të jeni të sigurt që kjo që po them këtu është në masën 80-90 për qind e vërtetë”, tha Berisha.

Emrat e kandidatëve të PD-së së Alibeajt për zgjedhjet vendore të 14 majit pritet të zbulohen të gjithë në ditët e para të dhjetorit, ku me interes do të pritet të shihen se kush do kandidojë për bashkitë e mëdha, si Tirana, Durrësi, Elbasani apo Shkodra.

LEXONI GJITHASHTU:

• Alibeaj për Portin e Durrësit: Vjedhje masive, nuk pati garë
• Berisha për kandidatët e Alibeajt për 14 majin: Janë në emër të Ramës