Përmbytjet në Ferras, Balluku monitoron situatën: Janë evakuuar banorët

Situata në zonën e Ferrasit ka arritur pikën kritike mbrëmjen e kësaj të enjteje pas daljes nga shtrati të lumit Vjosa. Në vendngjarje ndodhen Zv.Kryeministrja Belinda Balluku, Ministri i Mbrojtjes Pirro Vëngu dhe Kryebashkiaku i Fierit, Armando Subashi, për të koordinuar punën e forcave të ushtrisë dhe emergjencave civile.

Zv.Kryeministrja Balluku konfirmoi se operacioni i evakuimit është përmbyllur me sukses.

“Të gjitha familjet e rrezikuara nga vërshimi i ujërave në fshatin Ferras janë evakuuar,” u shpreh Balluku.

Ministri i Mbrojtjes, Pirro Vëngu, dha detaje mbi situatën e infrastrukturës mbrojtëse. Ai sqaroi se nuk kemi të bëjmë me çarje të digës, por me tejkalim të lartësisë së saj.

“Prurjet e orëve të fundit kanë qenë të tilla që kanë tejkaluar majën e argjinaturës. Megjithatë, struktura është ende e qëndrueshme dhe po reziston,” theksoi Vëngu.

Kryebashkiaku i Fierit, Armando Subashi, dha një lajm shpresëdhënës bazuar në matjet e bëra në rrjedhën e sipërme të lumit. Sipas tij, matjet në fshatin Kashisht tregojnë se niveli i ujit ka pësuar një rënie prej 15 cm brenda një ore.

“Kjo rënie pritet të reflektohet edhe këtu në Ferras pas dy a tri orësh, çka shpresojmë të sjellë një lehtësim të situatës,” deklaroi Subashi.

Operacionet e emergjencës vijojnë për monitorimin e situatës dhe për sigurinë e banorëve të zonës.