Përmet/ Abuzimi me 16-vjeçaren, pezullohet nga detyra shefi i krimeve: Kishte dijeni

Pas denoncimit të një rasti abuzimi seksual ndaj një vajze 16-vjeçare, Drejtoria Vendore e Policisë Gjirokastër ka pezulluar nga detyra Shefin e Seksionit për Krimet në Volum në Komisariatin e Përmetit, Komisar Dhurim Çenko. Vendimi është marrë më 19 shtator 2025, një ditë pasi ngjarja u bë publike.

Sipas njoftimit zyrtar, ndaj Komisar Çenkos ka nisur hetim disiplinor për shkelje të rëndë të detyrës, me arsyetimin se kishte dijeni për rastin dhe nuk ka vepruar. Hetimi bazohet në Ligjin Nr. 82/2024 “Për Policinë e Shtetit”, neni 121, pika 1, germa “a”, që parashikon masa ndaj punonjësve për mosveprim që ka sjellë pasoja të rënda.

Drejtoria e Policisë së Gjirokastrës ka bërë të ditur se hetime po kryhen edhe ndaj efektivëve të tjerë të cilët dyshohet se kanë qenë në dijeni të situatës. Çështja është në shqyrtim nga Drejtoria Rajonale e Agjencisë së Mbikëqyrjes Policore (AMP) në Vlorë–Gjirokastër.

E mitura, sipas hetimeve paraprake, ka qenë viktimë e abuzimit seksual për tre vite nga njerku i saj, P.B., efektiv në Policinë e Përmetit. Ndërkohë, Artur Ago, punonjës policie në Tepelenë, dyshohet se e ka ngacmuar seksualisht. Ago është shpallur në kërkim, ndërsa P.B. është arrestuar.

Në lidhje me këtë ngjarje janë arrestuar edhe dy shtetas të tjerë, Kristian Prifti, 46 vjeç dhe Isi Pasho, 27 vjeç. Ata akuzohen se kanë shantazhuar Artur Agon, duke i kërkuar 12 mijë euro për të mos publikuar një video që pretendohej se përfshinte marrëdhënie intime të tij me të miturën.

Dy punonjësit e policisë janë pezulluar nga detyra, ndërsa e mitura ndodhet nën kujdesin e familjes dhe asistencën e shërbimeve psikologjike.

LEXONI GJITHASHTU:

• Përmeti, qyteti i luleve që po mahnit turistët nga Kosova: Është vërtet një perlë
• Zjarret në Përmet djegin 15 hektarë pyje dhe kullota, kërkohet ndërhyrje nga ajri