Përplasi me makinë policin që lëvizte me biçikletë, arrestohet 33-vjeçari në Tiranë

Një 33-vjeçar është arrestuar nga policia e Tiranës pasi me automjetin që po drejtonte ka përplasur ditën e djeshme një efektiv policie, i cili po lëvizte me biçikletë.

33-vjeçari K.B., pasi ka aksidentuar 63-vjeçarin S.Gj., punonjës policie, është larguar nga vendi i ngjarjes.

Policia ka lokalizuar automjetin e përfshirë në aksident, të cilin po drejtonte një person tjetër, 37-vjeçari G.K., nën efektin e lëndëve narkotike, ndaj të cilit ka nisur një procedim penal në gjendje të lirë.

Gjatë kontrollit në automjet u gjet një sasi lënde narkotike kokainë, e cila u sekuestrua me cilësinë e provës materiale.

Polici i aksidentuar, shtetasi S. Gj., ka marrë ndihmë mjekësore dhe është larguar në banesë, jashtë rrezikut për jetën.

Njoftimi i policisë:

“Specialistët për Hetimin e Krimeve të Komisariatit të Policisë Nr. 1 arrestuan shtetasin K.B. (L.), 33 vjeç, si dhe referuan materialet në Prokurori, ku nisi procedimi në gjendje të lirë për shtetasin G.K., 37 vjeç.

Dje, 33-vjeçari përplasi me automjet biçikletën me të cilën lëvizte shtetasi S.Gj., 63 vjeç (punonjës policie që sapo kishte dorëzuar shërbimin), dhe u largua nga vendi i aksidentit.

Shërbimet e Policisë sekuestruan automjetin e përfshirë në aksident, i cili u lokalizua në momentin që drejtohej nga 37-vjeçari, dyshohet nën efektin e lëndëve narkotike. Gjatë kontrollit në automjet, u gjet një sasi lënde narkotike kokainë, e cila u sekuestrua me cilësinë e provës materiale.

Ndërkaq, i aksidentuar, shtetasi S.Gj. ka marrë ndihmë mjekësore dhe është larguar në banesë, jashtë rrezikut për jetën”, thuhet në njoftim.

LEXONI GJITHASHTU:

• Punëtori i ndërtimi humb jetën në Kinostudio, ra nga lartësia e pallatit
• Aksident në fshatin Hamallaj, humb jetën një këmbësor