Përplasja fizike në Kuvendin e Kosovës, reagon për herë të parë LVV

Lëvizja Vetëvendosje ka reaguar në lidhje me përplasjen fizike të ndodhur në Kuvendin e Kosovës.

Përmes një postimi në facebook VV shkruan se ky sulm erdhi si veprim i koordinuar mes degëve të ndryshme të së njëjtës bandë dhe vjen në një moment të rëndësishëm të ballafaqimit diplomatik e jo vetëm të Kosovës me Serbinë.

Në reagimin zyrtar LVV drejton gishtin për sulmin e ndodhur deputetët e PDK, të cilët i quan një bandë rrugaçësh që sulmuan kryeministrin dhe ministrat e Kosovës.

Postimi i plotë:

Krimi i organizuar dhe dora e zgjatur grusht nuk na ndalë në sjelljen e rendit dhe kushtetushmërisë në Republikë

Sot në Kuvendin e Kosovës dora e zgjatur e atyre që nuk e duan shtetësinë, demokracinë dhe ligjin e Kosovës, u përpoq të bëhet grusht.

Teksa kryeministri Albin Kurti po mbante fjalim duke treguar për betejën e Republikës së Kosovës për shtrirje të rendit e të ligjit në veri të vendit, disa deputetë të PDK sulmuan me grushta, si një bandë rrugaçësh, kryeministrin dhe ministrat e Kosovës.

Ky sulm po bëhet ndaj qeverisë së parë të Kosovës e cila nuk e ka asnjë ministër apo zv.ministër të kontrolluar nga Beogradi. Ky sulm po bëhet pikërisht në një moment të rëndësishëm të ballafaqimit diplomatik e jo vetëm të Kosovës me Serbinë.

Ky sulm erdhi si veprim i koordinuar mes degëve të ndryshme të së njëjtës bandë: disa prej tyre i thonë vetes deputetë, disa i thonë vetes gazetarë, e disa protestues. Por Kosova do të ecë përpara në konsolidimin e shtetësisë së saj, pavarësisht sulmeve të tilla.

Lëvizja VETËVENDOSJE! mbetet e përkushtuar dhe e angazhuar për drejtësi dhe kriminelët që kanë dëmtuar shoqërinë e shtetin tonë për t’u pasuruar padrejtësisht, nuk do të amnistohen.

Për të ndjekur kanalin e youtube të Euronews Albania KLIKO KËTU! 

LEXONI GJITHASHTU:

• VIDEO| Përleshje fizike në Kuvendin e Kosovës, sulmohet kryeministri Kurti
• Përplasjet fizike në kuvendin e Kosovës, reagon PDK: Qeveria e nisi dhunën
• Përplasja fizike në Kuvendin e Kosovës, Berisha: Shpreh keqardhjen time