Pësoi aksident teksa po largohej, si u arrestua autori i atentatit me dy viktima

Shkodra është tronditur mëngjesin e së hënës nga një atentat me armë zjarri në një lokal pranë godinës së bashkisë, ku mbetën të vrarë dy persona dhe u plagosën dy të tjerë.

Viktimat janë identifikuar si Armando Pali, ish-punonjës i IMT-së dhe ish-anëtar i Këshillit Bashkiak të Shkodrës, si dhe shtetasi Geridon Kraja. Të plagosur mbetën Erogen Vaso, alias Erogan Brajoviç, që dyshohet të ketë qenë objektivi i sulmit.

Plumbat kanë prekur dhe kamarieren e lokalit e cila ka mbetur gjithashtu e plagosur.

Autori i dyshuar i ngjarjes, Ragip Gilaj, tentoi të arratisej me motor, të cilin e braktisi në vendngjarje për t’u larguar më pas me një automjet. Gjatë ikjes ai pësoi një aksident në zonën e ish-kryqëzimit të “Degës” dhe u kap nga policia pas një ndjekjeje në një zonë të pabanuar. Në pamjet e siguruara nga Euronews Albania, shihen efektivët teksa i vihen pas në vrap dhe e neutralizojnë.

Burime bëjnë me dije se Gilaj kishte qenë më herët i arrestuar për armëmbajtje pa leje dhe trafik droge, por ishte liruar nga autoritetet. Ai dyshohet se është një vrasës me pagesë.

LEXONI GJITHASHTU:

• VIDEO/ Efektivët me armë në duar ndjekin e arrestojnë autorin e atentatit në Shkodër
• FOTO/ U vu në pranga nga policia, kush është autori i dyshuar i atentatit në Shkodër