Petro Koçi për protestën e 6 dhjetorit: Fryma berishiste në PD është shumë e fortë

Deputeti i Partisë Socialiste, Petro Koçi e sheh si një hap të gabuar, vendimin e Partisë Demokratike dhe opozitës në tërësi, për të protestuar më 6 dhjetor, në të njëjtën ditë kur në Tiranë do të mbahet Samiti BE-Ballkani Perëndimor.

Në një intervistë për Euronews Albania, Koçi u shpreh se Berisha mund të ketë qenë emocional kur ka marrë këtë vendim.

Sipas tij, me protestën, Berisha kërkon të tregojë se e komandon ai Partinë Demokratike dhe mendon se kjo lidhet edhe me vendimin që gjykata pritet të japë për fatin e kësaj partie.

Koçi nënvizoi se shumica në PD mbështet Berishën. Ai shtoi se fryma berishiste është shumë e fortë në këtë forcë politike.

“Mendoj që është një hap shumë i gabuar i opozitës, sepse data 6 dhjetor, është datë shumë e rëndësishme jo vetëm për politikën shqiptare, por për marrëdhëniet e BE me Ballkanin Perëndimor dhe zgjedhja e Tiranës është një gjë shumë sinjifikative. Në raport me integrimin evropian, Shqipëria duhet të dëshmojë se ka unitet kombëtar. Mendoj që fillimisht duhet të ketë qenë shumë emocional kur e ka marrë vendimin. Kam vënë re një lloj dialektike, me kalimin e ditëve, për shkak edhe të mosbesimit të brendshëm në PD, figura të ndryshme besoj që kanë reaguar.

Kanë folur edhe për manifestim tani, ne e kemi me Edi Ramën, ka një lloj paqartësie. Kam përshtypjen se do të dëshmojë që Partinë Demokratike e komandoj unë, ka një lidhje edhe me vendimin e gjykatës. Unë besoj se në shumicë, PD e mbështet zotin Berisha, nga ajo që perceptoj, duket që shumica e anëtarëve të PD mbështesin Berishën. Fryma berishiste në PD është shumë e fortë. Është e pamundur për momentin të gjykosh se ka një shkëputje të PD nga berishizmi”, theksoi ai.

LEXONI GJITHASHTU

• Çfarë do të ndodhë më 6 dhjetor? Policia e ndalon protestën, PD nuk tërhiqet
• Berisha: Përshëndes Steinmeier, mirënjohje për kujdesin që tregoi ndaj Nishanit
• ‘Liderët evropianë s’janë si Rama’, Berisha për protestën: Bulevardin s’e lëshojmë