Pezullohen 89 patenta në Bypass-in e Fierit dhe rrugën Lushnjë – Durrës

Policia e Shtetit ka pezulluar 89 leje drejtimi për periudhën nga 3 deri në 14 muaj gjatë një kontrolli të orëve të fundit në Bypass-in e Fierit dhe në aksin rrugor “Lushnjë – Durrës”.

Shoferët janë kapur teksa lëviznin me shpejtësi nga 142 km/h deri në 179 km/h.

Ndërkohë janë vendosur masa administrative nga 20.000 deri në 80.000 lekë të rinj, si dhe janë zbritur nga lejet e drejtimit, nga 10 deri në 13 pikë.

Për kapjen e shkelësve janë përdorur makina inteligjente, radarë automatikë, dron “edukues”, flotë të re të automjeteve, të pajisura me bazë logjistike bashkëkohore, si radarë që masin shpejtësinë në lëvizje dhe lexues automatikë të targave, kamera, aparate fotografike  dhe patrulla në lëvizje, me makina të paloguara.

Policia e Shtetit apelon për të gjithë drejtuesit e automjeteve dhe të motomjeteve që të respektojnë me rigorozitet rregullat e qarkullimit rrugor.