Piloti i parë kinez në F1, Guanyu Zhou garon për ‘Alfa Romeo’

Guanyu Zhou është piloti i parë kinez i Formula 1, pas nënshkrimit të kontratës për të garuar me ‘Alfa Romeo’ vitin e ardhshëm.

Skuderia italiane e cilësoi Zhou, aktualisht pilot i Formula 2, një element që do të shkruajë një faqe të re në historinë moto-sportive të vendit të tij.

Zhou, 22 vjeç, do të jetë partner i Valtteri Bottas. Ai do të zëvendësojë Antonio Giovinazzi, që ka garuar për “Alfa Romeo” që prej vitit 2019, por që nuk do të jetë më në radhët e Formula 1 vitin e ardhshëm.

“Kam ëndërruar që i vogël të ecja sa më përpara në këtë sport pas të cilit jam apasionuar dhe tani kjo ëndërr është bërë realitet”, deklaron Zhou.

Ai shprehet se ndihet i përgatitur për sfidën e madhe që e pret në Formula 1, përkrah një talenti të sprovuar si Valtteri Bottas.

Zhou ka qenë pjesë e akademisë së pilotëve të ‘Ferrari-t’ në periudhën 2014-2018 dhe u zhvendos për të garuar për ‘Renault’ në vitin 2019. Ai ka qenë një pilot në provë për skuderinë franceze në dy vitet e fundit.