Pipero: Po shtohen kërkesat e të rinjve për t’u specializuar si mjekë infeksionistë

Pëllumb Pipero thotë se këtë vit është shtuar kërkesa nga të rinjtë për t’u specializuar si mjekë infeksionistë.

Në emisionin “Good Morning Albanians” në Euronews Albania, Pipero u shpreh se COVID-i, krahas problemeve, solli edhe  një eksperiencë të re për mjekët.

“Kjo është e vërtetë. Ndryshe nga çdo vit tjetër, në programin e sëmundjeve infektive, nëse çdo vit mezi vinin 6 apo 7, këtë vit na kanë ardhur mbi 20 specializantë, për t’u bërë infeksionistë. Ky është vërtet lajm. COVID-i, krahas shumë problemeve të këqija, së pari, ne morëm një eksperiencë të re.

Së dyti, vendi di si t’i përgjigjet një sfide të tillë shëndetësore nesër. Së treti, sëmundjet infektive të këtij vendi, u bënë me spital modern. Së katërti, auditoret tona janë me më shumë mjekë për t’u specializuar për sëmundjet infektive. Së fundmi, ne mjekët infeksionistë kemi për çfarë të bëhemi krenar pas sfidës me COVID-19”, theksoi ai.