Ka nisur me përplasje protesta e Partisë Demokratike dhe opozitës pasditen e së martës në Tiranë.
Tensione ka pasur në zonën e Zogut të Zi dhe te Pallati me shigjeta ku protestuesit janë përplasur me policinë që u ka kërkuar të mos bllokojnë qarkullim e automjeteve.
Në zonën e Pallatit me Shigjeta, deputetët Luçjano Boçi, Klevis Balliu Elda Hoti janë përplasur me policinë duke i kërkuar t’i lejojnë të zhvillojnë protestën për të cilën siç thanë kanë marrë leje paraprakisht.
Sipas tyre policia është duke ushtruar dhunë ndaj qytetarëve që janë në të drejtën e tyre për të protestuar.
E njëjta situatë paraqitet edhe në kryqëzimet e tjera të bllokuara nga protestuesit e PD. Në sheshin Uillson ka qenë deputeti i PD Gazment Bardhi i cili ka debatuar ashpër me efektivët e policisë që kanë kërkuar të lirojnë qarkullimin e automjeteve.
PD ka kërkuar 3 orë leje për të organizuar tubimet, duke nisur nga ora 17:00.
Ndërkohë policia, ka marrë masat për këto protesta, por u ka kujtuar organizatorëve se bllokimi i rrugëve është vepër penale.
Protesta do të zhvillohen në rreth-rrotullimin e Zogut të Zi, urës afër xhamisë në Rrugën e Elbasanit, sheshi “Wilson”, pallati me shigjeta dhe rruga së Kavajës.
