Po i vendoste eksplozivin një makine, shpërthimi i merr jetën 25-vjeçarit

Një 25-vjeçar në Elbasan ka humbur jetën, pasi po i vendoste lëndë eksplozive një makine e aksidentalisht ka shpërthyer pranë tij.

Ngjarja mësohet të ketë ndodhur rreth orës 04:10, në lagjen “Shënkoll” në Elbasan, pranë automjetit tip “Volkswagen”, në pronësi të shtetasit Renato Çepa.

Dyshohet se 25-vjeçari ka vendosur lëndën eksplozive në mjet, e cila ka shpërthyer, duke i shkaktuar dëmtime të rënda.

Pas shpërthimit, 25-vjeçari është transportuar me urgjencë në spital, por, për fat të keq, ka humbur jetën si pasojë e plagëve të marra.

Mësohet se ngjarja ka ndodhur për motive të dobëta, si shkak i një konflikti të vjetër.

Policia ka ngritur një grup të posaçëm hetimor, përfshirë specialistë nga Hetimi i Krimeve të Rënda të Drejtorisë Vendore të Policisë Elbasan dhe Departamentit të Policisë Kriminale, në bashkëpunim me Prokurorinë.

Njoftimi i Policisë:

Në vijim të informacionit të dhënë mëngjesin e sotëm, ku si pasojë e shpërthimit të lëndës eksplozive, gjatë vënies së saj, në automjetin tip “Volkswagen” në pronësi të shtetasit R. Ç., në lagjen “Shënkoll”, ishte dëmtuar autori, i cili humbi jetën në spital, ju informojmë se pas verifikimeve të kryera, është identifikuar ky shtetas, konkretisht K. B., 25 vjeç, banues në Elbasan.

Nga hetimet e deritanishme ka rezultuar se 25-vjeçari, për shkak të një konflikti të vjetër, për motive të dobëta, mëngjesin e sotëm, ka vënë lëndë eksplozive në automjetin e shtetasit R. Ç.

Lënda eksplozive ka shpërthyer gjatë vënies dhe si pasojë 25-vjeçari ka humbur jetën, në spital.

Një grup i posaçëm hetimor, i përbërë nga strukturat hetimore të DVP Elbasan dhe të Komisariatit të Policisë Elbasan, si dhe nga ekspertë të Departamentit të Policisë Kriminale në DPPSH, në drejtimin e Prokurorisë, vijon punën pët të zbardhur të gjitha rrethanat e këtij rasti.

LEXONI GJITHASHTU:

• EMRI| Kush është shqiptari që u kap me armë dhe eksploziv në mes të Athinës
• Çifti shqiptar kapet me armë dhe eksplozivë në makinë, bllokohet qendra e Athinës