Pogradec, mungesa e krahut të punës pengesë për sektorin e prodhimit dhe shërbimeve

Pogradeci, në dy vitet e fundit, ka pasur një mungesë të theksuar të fuqisë punëtore, mungesë që reflektohet më shumë në sektorin e prodhimit dhe shërbimeve.

Altin Pojanaku ka një furrë në qytetin e Pogradecit. Deri para pak vitesh, ai kishte 12 punonjës, ndërsa sot, për shkak të mungesës së fuqisë punëtore, punon vetëm me bashkëshorten e tij.

“Kemi tre-katër muaj që kërkojmë punonjës, nga më të thjeshtët, pa eksperiencë pune, deri te zanatçinjtë me përvojë. Po bëjmë shumë mundim, por nuk vjen njeri që të pyesë për punë. Ndoshta nuk duan të punojnë, ose mund të kenë shkuar e ikur,” thotë Altin Pojanaku, pronar i një furre buke.

Mungesa e fuqisë punëtore haset edhe në sektorin e transportit. Jori Ibi, menaxher i një firme transporti, tregon se vështirësia e gjetjes së punëtorëve është tejet e madhe, dhe për këtë arsye janë detyruar të përdorin punonjës nga jashtë.

“Nevoja për të zgjeruar punëtorët është e vazhdueshme. Na duhen punëtorë të thjeshtë për transportin, mekanikë dhe gjithashtu profesione të tjera që përfshin zanati ynë. Kërkuam 20 punëtorë, gjetëm disa, por kemi vështirësi në Pogradec. Kemi lidhje kontrate me punëtorë nga jashtë dhe kështu arrijmë qëllimin,” thotë Jori Ibi, menaxher i një kompanie transporti.

Edhe këtë vit, vështirësitë për të gjetur punonjës në sektorin e shërbimeve vazhdojnë të hasen, veçanërisht në sektorin e hotelerisë, restoranteve dhe bareve.

LEXONI GJITHASHTU:

• Rriten çmimet e banesave në Pogradec, penalizohen vendasit, 1200 euro 1 m/2
• Pogradeci do të ketë më shumë plazhe publike, raporti 80% me 20%