Polemika për sulmin në Donjeck/ Ukraina mohon përgjegjësinë për 28 vrasjet

Ushtria ukrainase ka mohuar përfshirjen e saj në bombardimin e qytetit të Donjeckut, i kontrolluar nga rusët, ku gjetën vdekjen 28 persona. Shumë media ukrainase akuzojnë në mënyrë direkte Moskën, por vetë politikanët në Kiev nuk e kanë komentuar ngjarjen. Në fjalimin e përnatshëm, presidenti Zelensky as që e përmendi atë.

 “Çdo gjë që forcon Ukrainën dhe mbron popullin tonë i jep forcë të gjithë popujve në Evropë dhe kujtdo në botë që respekton ligjin ndërkombëtar. Çdo gjë që dobëson Rusinë dhe e kthen luftën në territorin e saj i kontribuon stabilitetit të marrëdhënieve ndërkombëtare dhe shpëton botën nga krizat”,-tha presidenti i Ukrainës.

Ndërkohë, mediat ukrainase njoftuan se shërbimi vendas i sigurisë, SBU, kishte planifikuar dhe organizuar sulmin ndaj terminalit të transporteve pranë Shën Pjetërburgut. Duke cituar burime anonime, organet mediatike raportuan se terminali ishte një pikë jetike për furnizimin e trupave ruse.

Sa i takon situatës në terren, të dyja palët konfirmuan se njësitë ruse morën nën  kontroll një fshat strategjik në kufirin administrativ mes rajoneve Kharkiv dhe Luhansk, një zonë ku Kremlini po përpiqet të avancojë ofensivën, por ku nuk po arrin dot sukses.

LEXONI GJITHASHTU:

• 25 të vrarë në një sulm në Donetsk, zyrtarët pro-rusë akuzojnë Ukrainën
• Raportohet se mbi 42.000 ushtarë rusë janë vrarë në luftën në Ukrainë