“Pozitive…”, Dumani tregon sa shtetas shqiptarë janë ekstraduar nga Dubai këtë vit

Kreu i SPAK, Altin Dumani, në raportimin e tij në Komisionin e Ligjeve mbi punën e institucionit për vitin 2024, foli edhe lidhur me ekstradimet nga Dubai.

Dumani e cilëson këtë çështje si një zhvillim pozitiv i vitit 2025, që ka sjellë një përmirësim të ndjeshëm në bashkëpunimin me Emiratet e Bashkuara Arabe.

“Në vitin 2024 situata ishte problematike dhe ekstradimi i personave të kërkuar nga SPAK ishte thuajse i pamundur, gjatë këtij viti janë ekstraduar nga Dubai 8 shtetas shqiptarë. As vetë nuk e kishim imagjinuar këtë situatë pozitive me autoritetet e Emirateve të Bashkuara Arabe,” u shpreh Dumani.

Dumani vuri në dukje se statusi aktual i ndërlidhësve të sektorit të bashkëpunimit ndërkombëtar është i papërshtatshëm, pasi ata trajtohen si nëpunës civilë, ndërkohë që detyrat e tyre përfshijnë kryerjen e veprimeve procedurale. Ai kërkoi rishikimin e statusit të tyre për të përmirësuar efikasitetin në bashkëpunimin ndërkombëtar penal.