Presidenti Bajram Begaj priti në Presidencë homologun e tij sllovak, Peter Pellegrini.

Begaj falenderoi Sllovakinë për mbështetjen e dhënë për procesin e integrimit të Shqipërisë drejt Bashkimit Evropian.

Ai theksoi se gjatë takimit u diskutua për rritjen dhe forcimin e bashkëpunimit ekonomik mes dy vendeve.

Duke u ndalur në integrimin e Shqipërisë në BE, presidenti Begaj u shpreh se vendi ynë synon të mbyllë negociatat me Bashkimin Evropian deri në vitin 2027, ndërsa anëtarësimi i plotë sipas tij pritet të realizohet deri në vitin 2030.

“Në bisedimet tona, vumë theksin në rritjen dhe zgjerimin e bashkëpunimit ekonomik dhe lidhjeve tregtare mes dy vendeve tona. Ka mundësi konkrete për të thelluar dhe forcuar më tej bashkëpunimin ekonomik dypalësh. Diskutuam gjithashtu për turizmin, ku Shqipëria gjatë vitit 2024 ishte një nga destinacionet më të rëndësishme. Po ashtu, diskutuam për fusha të tjera si bujqësia, mbrojtja e natyrës dhe arsimi. Një temë e rëndësishme e bisedimeve ishte edhe integrimi evropian, ku Sllovakia ka qenë një mbështetëse e fuqishme për zgjerimin e Bashkimit Evropian. Sllovakia na ka ofruar asistencë dhe ekspertizë për proceset integruese të Shqipërisë drejt BE-së, dhe ne jemi mirënjohës për këtë mbështetje. Jemi optimistë për hapjen e të gjithë grupeve të kapitujve gjatë këtij viti, ndërsa synojmë të mbyllim negociatat me BE deri në vitin 2027. Po ashtu, jemi të bindur se do të arrijmë finalizimin e anëtarësimit të plotë të Shqipërisë në Bashkimin Evropian deri në vitin 2030.

Presidenti sllovak, Peter Pellegrini, tha se vizita e tij në Shqipëri është historike për marrëdhëniet mes dy vendeve tona ndërsa shprehu mbështetjen e plotë ndaj vendit tonë për integrimin në BE.

“Është hera e parë që një president i Sllovakisë viziton vendin tuaj. Kemi marrëdhënie të sinqerta për mbrojtjen, të lidhura me anëtarësinë në NATO. Për shkak të kësaj vizite, do të shtojmë dhe fuqizojmë bashkëpunimin. Jam shumë i kënaqur që po vijojmë me bursa për studentët shqiptarë në Sllovaki dhe presim që numri i tyre të rritet edhe më shumë. Shqipëria po bëhet një destinacion i ri turistik për qytetarët sllovakë, me shifra që po rriten vit pas viti. Pa zgjerimin e BE-së, përfshirë Ballkanin Perëndimor, Unioni nuk do të jetë i plotë. Ne do të jemi aleatët tuaj për integrimin dhe një avokat i fortë për ju në këtë rrugë. Shqipëria ka bërë një progres të madh dhe vlerësojmë reformat dhe përmirësimin në të gjitha fushat,” tha Pellegrini.

LEXONI GJITHASHTU:

• Begaj për njohjen e Kosovës nga Kenia: Vendim i mirëpritur nga të gjithë shqiptarët
• Bajram Begaj vizitë në Austri, zbardhen diskutimet me Presidentin Van der Bellen