Kthehen në RMV trupat e viktimave të aksidentit në Bullgari

Me dy avionë ushtarak mbërritën mëngjesin e së premtes në shtëpi trupat e pajetë të 45 qytetareve të cilët humbën jetën në aksidentin tragjik të 23 nëntorit në autostradën “Struma”, në Bullgari.

Krahas autoriteteve me te larta te shtetit në Maqedoninë e Veriut, në ceremoni morën pjesë edhe presidentja e Kosovës Vjosa Osmani, kryetarja e Kuvendit të Shqipërisë Lindita Nikolla së bashku me ministrat Niko Peleshi, Bledi Ccuci dhe Elisa Spiropali.

Në mesin e viktimave janë edhe 12 fëmijë. Shumica e viktimave janë familjarë që po ktheheshin nga Stamboll pas një vizite treditore.

Të gjitha viktimat janë shqiptarë të Maqedonisë së Veriut.

Presidenti Stevo Pendarovski, kryetari i Kuvendit Talat Xhaferi, kryeministri Zoran Zaev dhe zyrtarët tjerë të shteteve fqinje vendosën kurora me lule në nderim të viktimave.

Aksidentit tragjik i mbijetuan shtatë udhëtarë, të cilët janë në gjendje të qëndrueshme shëndetësore.

Ende nuk dihen shkaqet e aksidentit të autobusit. Paraprakisht, zëvendës-kryeprokurori bullgar, Borislav Sarafov, nuk e ka përjashtuar mundësinë që shkaktari i zjarrit të ketë qenë përplasja e autobusit në bankinën e autostradës.

Edhe prokurorët maqedonas nuk e kanë përjashtuar mundësinë që zjarri të jetë shkaktuar nga shkëndijat, të cilat janë shndërruar në zjarr të fuqishëm pas përplasjes së autobusit me bankinat e hekurta përgjatë autostradës.

LEXONI GJITHASHTU:

• Autobusi ku vdiqën 45 persona në Bullgari pa leje qarkullimi
• Politikanët nga Shqipëria dhe Kosova ngushëllime për aksidentin me 46 viktima në Bullgari