Profesori amerikan ngjall debat: Nuk ka karrierë me punë nga shtëpia

Për disa njerëz të punuarit nga shtëpia është shumë komode, sidomos pasi e kanë provuar si një eksperiencë për një kohë relativisht të gjatë. Për shumë të tjerë është e pakonceptueshme që të punojnë gjithë kohën nga shtëpia, ankohen se nuk përqendrohen, i duhet të merren edhe me punë të tjera…etj.

Së fundmi, Scott Galloway (studiues i marketingut), i cili është i njohur si profesori amerikan që gjithmonë është “kundër rrymës”, ka ndarë mendimin e tij kritik lidhur me ata që punojnë nga shtëpia.

Në Samitin e Këshillit të CEO-ve të “Wall Street Journal”, ai foli mbi mënyrën se si arrihet suksesi dhe teksa iu drejtua të rinjve, ai u shpreh: Mos punoni kurrë nga shtëpia. Shtëpia është vetëm për gjumë, duhet të jesh jashtë tërë kohën!

Si ekspert marketingu, Scott gjithmonë ndez debat me këshillat e tij. Këtë herë të shumtë janë ata që janë kundër tij. Në rrjetet sociale, shumë të rinj thonë se puna nga shtëpia është shumë efektive në ditët e sotme dhe se nuk do hiqnin dorë nga ajo mundësi. Profesori i njohur ka folur përmes podcaste-ve dhe intervistave të tij në media për shqetësimin e tij më të madh: rritja e vetmisë dhe shëndeti i rënduar mendor tek të rinjtë.

Sipas tij, stresi në nivele të larta i atribuohet edhe ambientit të punës, shpenzimeve, kostos së qirasë, ngrënies së ushqimit në punë e deri te koha shumë e pakët që të rinjtë shpenzojnë jashtë.

Scott e thotë me bindje se puna nga shtëpia i bën të rinjtë të shkëputen nga miqtë dhe pjesa e tjetër e shoqërisë dhe nuk u shërben aspak për të bërë karrierë, madje e ngadalëson atë.

Hulumtimi më i fundit thotë se më shumë se gjysma e amerikanëve punojnë nga shtëpia të paktën një herë në javë. Scott thekson se suksesi garantohet vetëm kur njeriu eksploron dhe ndërvepron me njerëzit.