Progres raporti i KE, Balluku: Është përshpejtuar anëtarësimi në BE

Zv. kryeministrja Belinda Balluku ka marrë në dorëzim raportin e KE-së për Shqipërinë.

Në një deklaratë për mediat ajo ka cituar raportin i cili thotë se vetingu ka bërë progres në mënyrë të kënaqshme.

Në politikën e jashtme dhe të sigurisë, thuhet në raport, Shqipëria ka ruajtur linjën e Bashkimit  Europian.

“Qëndrimi i Shqipërisë është një sinjal i fortë i zgjedhjes strategjike të anëtarësimit në Bashkimit Europian dhe i rolit të saj si një partner i besueshëm i Bashkimit Europian. Falë këtyre arritjeve, Shqipëria u hoq nga lista e juridiksioneve në monitorim të shtuar, ose ndryshe e njohur si lista gri në tetor të vitit 2023,” – tregoi Balluku.

Në raport thuhet gjithashtu se Shqipëria është e përgatitur për zhvillimin e një ekonomie tregu funksionale.

“Me kënaqësi të madhe konstatojmë se ky raporti është më pozitiv i hartuar ndonjëherë për vendin tonë dhe që përfaqëson në mënyrë të drejtpërdrejtë ecurinë shumë të mirë të reformave të thella që ne kemi ndërmarrë dhe rezultatet e tyre konkrete në forcimin e shtetit të së drejtës, luftës kundër krimit të organizuar dhe sundimit të ligjit.

Ky raport është një vlerësim real, i drejtë dhe krejtësisht i pavarur i asaj që Shqipëria ka arritur përmes reformave ligjore, institucionale dhe ekonomike, efektet e të cilave janë në sytë e qytetarëve tanë por që marrin një rëndësi edhe më të madhe kur certifikohen nga BE që së bashku me SHBA, janë partnerët tanë kryesorë strategjikë. Nga korriku i vitit 2022 dhe deri më tani, Shqipëria dhe Komisioni Evropian kanë zhvilluar fazën e parë përgatitore pas çeljes së negociatave, atë të shqyrtimit analitik të BE-së. Sikurse evidentohet edhe në raport, nën koordinimin e krye negociatores dhe strukturave të reja të reformuara për negociatat e BE-së, institucionet shqiptare kanë mobilizuar burime të konsiderueshme për t’u angazhuar aktivisht në procesin e shqyrtimit dhe për t’u përgatitur për hapat e ardhshme të negociatave të anëtarësimit,” – deklaroi Balluku.

LEXONI GJITHASHTU:

• Sistemi i ri i pagave në OSHEE, Balluku: Do të konsiderohet vjetërsia në punë
• Koçiu e Balluku me gratë në Patos: Ndërgjegjësimi për kancerin, ka ulur fatalitetet