Zëvendës presidenti i Komisionit Europian Josep Borell dhe ministrja e kulturës Elva Margariti, së bashku me kryebashiaken Emiriana Sako kanë inspektuar punimet e restaurimit për rijetësimin e Kullës Venciane të Durrësit. Kjo kullë synohet të kthehet në një qendër digjitale informacioni për historinë dhe trashëgiminë kulturore të Durrësit.
Monumenti i kategorisë së parë është një nga asetet më të rëndësishme të trashëgimisë kulturore të Durrësit, por që prej tërmetit të nëntorit 2019 ai qëndron i mbyllur për publikun.
Punimet për restaurimin e Kullës Veneciane nisën në shkurt të vitit të kaluar dhe pritej të përmbylleshin brenda 6 muajsh. Projekti për rijetësimin e saj po realizohet përmes programit EU4Culture, me një vlerë prej rreth 690 mijë euro dhe po zbatohet nga UNOPS.
Kulla Veneciane pritet të hapet për publikun e gjerë dhe turistët në muajin qershor. Në proces restaurimi me fondet e BE-së janë edhe dy monumente të tjera të trashëgimisë kulturore: Muzeu Arkeologjik dhe Hamami turk.
Në faqen zyrtare në rrjete sociale, programi EU4Culture ka përditësuar shpesh informacionet lidhur me vijimësinë e punimeve për rijetësimin e Kullës Veneciane dhe kthimin e saj në qendër digjitale informacioni.
“Shumë shpejt të gjithë vizitorët do të jenë në gjendje të shijojnë historitë e mahnitshme, gojëdhënat dhe tregimet magjepsëse që Kulla ofron nëpërmjet kupolave të projektimit, instalimeve interaktive, përvojës së realitetit virtual, audio udhëzuesve, shikimit përmes periskopëve dhe shumë mjeteve të tjera inovative!”,- shkuante EU4Culture në një postim të muajve më parë.
LEXONI GJTHASHTU: