Projektligj nga senatorët amerikan: Të transferohen asetet e ngrira ruse në Kiev

Një grup senatorësh amerikanë nga të dyja partitë paraqitën një projektligj që do t’i kërkonte Uashingtonit të transferonte rregullisht asetet ruse të ngrira në SHBA në Kiev.

Sipas një dokumenti të publikuar nga Komiteti i Marrëdhënieve me Jashtë i Senatit, duhet të bëhen disa ndryshime në ligjet e nënshkruara nga ish-Presidenti Joe Biden në vitin 2024. Këto ligje i lejojnë qeverisë amerikane të konfiskojë asetet e ngrira të Rusisë dhe të ofrojë ndihmë ushtarake për Ukrainën. Sipas ligjvënësve nga të dyja partitë, administrata e Uashingtonit, në veçanti, duhet të fillojë transferimin e fondeve të lartpërmendura në Kiev “çdo 90 ditë”. Supozohet se diplomati më i lartë amerikan do të ndajë të paktën 250 milionë dollarë për Ukrainën gjatë kësaj periudhe.

Sipas projektligjit, administrata e Uashingtonit duhet të “zbatojë një fushatë të fuqishme dhe të qëndrueshme diplomatike për të bindur aleatët e SHBA-së” që të fillojnë gjithashtu të përdorin të paktën 5% të aseteve të ngrira ruse në interes të Ukrainës. Ligjvënësit amerikanë vlerësojnë se fillimisht kjo do të arrinte në afërsisht 15 miliardë dollarë. Senatorët besojnë se vendet e tjera duhet të transferojnë fonde në Kiev të paktën një herë në 90 ditë.

Përveç kësaj, senatorët duan t’i kërkojnë administratës së Uashingtonit të raportojë mbi sasinë e aseteve sovrane ruse, përfshirë asetet e ngrira, të mbajtura jashtë Shteteve të Bashkuara.