Projektligji për shtetësinë në RMV, Zaev takon Selën dhe Gashin

Krerët e koalicionit opozitar shqiptar Aleanca për Shqiptarët – Alternativa, Ziadin Sela dhe Afrim Gashi, takuan sot kryeministrin e Maqedonisë së Veriut Zoran Zaev për të gjetur zgjidhje për Ligjin për Shtetësi.

Ky projekt-ligj i opozitës shqiptare, i cili synon të zgjidhë problemin e mijëra personave pa shtetësi, ishte refuzuar fillimisht si nga LSDM-ja qeverisëse ashtu edhe nga VMRO–DPMNE opozitare.

Korrespondenti i Euronews Albania, Benjamin Arifi raporton se gjatë takimit ka pasur përparim dhe pritet që deri të premten të gjendet zgjidhje përfundimtare. Çështje në diskutim është se sa kompetenca do të kenë agjencitë e shërbimeve inteligjente si dhe kushtin për të garantuar tre dëshmitarë që faktojnë lindjen në Maqedoninë e Veriut të personave që nuk kanë shtetësi.

Çështja e personave pa shtetësi ishte përmendur edhe në raportin e fundit të Departamentit Amerikan të Shtetit për liritë dhe të drejtat e njeriut në Maqedoninë e Veriut.