Protesta e opozitës, Gazment Bardhi: Krimi dhe korrupsioni po sundojnë vendin

Duke folur nga protesta e opozitës para kryeministrisë, kryetari i grupit parlamentar të PD-së, Gazment Bardhi, tha se vendi po kalon një kohë të vështirë, ku po sundon krimi i organizuar dhe korrupsioni.

Teksa falënderoi pjesëmarrësit në protestë ai tha se shoqëria shqiptare ka ende një zemër dhe ende guxim.

“Në çdo takim që kam patur me ju demokrat dhe qytetarë të lirë, kam marrë prej jush një mesazh që ju nuk dorëzoheni. Të gjithë bashkë nuk dorëzohemi. Kam mësuar se sakrifica dhe besimi janë dy vlerat më të mëdha që na kanë mbajtur gjithmonë në këmbë, se sakrifica dhe besimi do të na çojnë përpara për t’u përballur me pengesën dhe problematikën më të madhe të shqiptarëve, largimin e Edi Ramës, kryeministrit më të korruptuar dhe të inkriminuar në botë. Kjo protestë është për dinjitetin tonë të përbashkët dhe për të ardhmen, që nuk ia falim Edi Ramës. Jemi këtu sepse korrupsioni po na merr frymën. Kartelët e drogës po na vjedhin të ardhmen. E keqja nuk do të triumfojë. Ne jemi për t’i thënë hajdutëve dhe kriminelëve që koha e tyre ka mbaruar. Tani është koha e qytetarëve të ndershëm. Këtij pushteti i janë tundur themelet, Rama ka frikë se e vërteta ka dalë. Ky popull, kur zgjohet, nuk ndalet më. Sot është koha të guxojmë. Asnjë pushtet nuk bie me lutje, asnjë pushtet nuk bie në heshtje, asnjë pushtet nuk i reziston dot një populli që nuk do të dorëzohet. Rama duhet ta ketë të qartë se qytetarët do t’i kenë përballë deri në largimin e tij. Asnjë regjim nuk ka rënë nga fjalimet, por kur njerëzit nuk kanë pranuar poshtërimin si normalitet, prandaj qëndroni, rezistoni, mos u përkulni. Qëndresë sot, rezistencë nesër dhe fitore së shpejti për Shqipërinë”, tha Bardhi.

LEXONI GJITHASHTU:

• LIVE| Nis protesta e opozitës, Berisha i bashkohet protestuesve në bulevard