PS-PD bashkojnë votat, Komisioni i ligjeve miraton rritjen e pagave

Mazhoranca dhe opozita miratuan në unanimitet në komisionin e ligjeve projektligjin për rritjen e pagave në administratën publike dhe institucionet e tjera kushtetuese dhe të pavarura.

Ministrja e ekonomisë dhe financave, Delina Ibrahimaj tha se përfitojnë nga rritja e pagave 130 331 punonjës të administratës.

“Ne kemi bërë një analizë të thellë dhe kemi gjykuar që nevojitet një ndërhyrje e thellë në ligjet që parashikojnë reformat për pagën. Sot ne po bëjmë realitet një rritje pagash e cila deri pak vite më parë ishte e pamenduar duke çuar pagën mesatare në nivelin 900 euro në harkun e një viti”- tha Delina Ibrahimaj, ministre e financave dhe ekonomisë.

Deputeti demokrat, Saimir Korreshi vlerësoi nismën por kërkoi vëmendje më të shtuar për disa kategori më në nevojë.

“Po ti kontrollosh burrat në Lushnjes ti kthesh përmbys nuk i gjen as 50 lekë, po ti thërrasësh për kafe nuk të vijnë se thotë e kam pirë, e kishte pirë në datë 1 kur mori rrogën. Ne jemi pro rritjes së rrogave, të ishte rritur me kohë, por ka disa kategori si pensionistët, ata me ndihmë ekonomike”- nënvizoi Saimir Korreshi, deputet i PD-së.

Pas deputetëve të komisionit të ekonomisë dhe ata të ligjeve kërkuan rritje të pagave të tyre. Kërkesa u bë nga deputeti socialist Klevis Xhoxhi.

“Do i sugjeroja komisionit të ekonomisë dhe financave rishikimin e raportit të pagës në lidhjen numër 1 për funksionin në seksionin A,B,C,D”-Klevis Xhoxhi, deputet i PS.

“Me sugjerimin e kolegut relator zotit Xhoxhi që të rishikohet raporti i pagës për funksionet e seksionit A,B,C dhe D të lidhjes 1 në kuadër të parimit të hierarkisë së pagës. Kjo do të jetë pjesë e sugjerimit të komisionit tonë për komisionin përgjegjës, komisionin e ekonomisë”- përfundoi Klotilda Bushka kryetare e komisionit të ligjeve.

LEXONI GJITHASHTU: 

• Nga veriu në jug, rritet interesi për pushime të shkurtra në Shqipëri
• Votuan gratë, bojkotuan burrrat! Të dhënat interesante nga zgjedhjet e 14 majit