PS propozon heqjen e KZAZ-ve: Kutitë të numërohen në qendrat e votimit

Partia Socialiste ka propozuar rikthimin e numërimit të votave në vetë qendrat e votimit, një praktikë që përdorej deri në vitin 2005. Propozimi u bë publik gjatë mbledhjes së Komisionit për Çështjet Ligjore këtë martë, ku drejtuesi i tij, Ulsi Manja, theksoi se nuk ekzistojnë më arsyet që e detyruan zhvendosjen e numërimit në KZAZ.

“Duhet të adresohet shpejt procesi i numërimit të votave. Nëse do t’i kthehemi numërimit në qendrat e votimit, është krejtësisht e mundur që edhe rezultati në Shqipëri të dalë në një kohë rekord, jo më shumë se 2 orë pas mbylljes së votimit,” u shpreh Manja.

Sipas tij, arsyet e dikurshme garantimi i procesit dhe shmangia e konflikteve tashmë nuk qëndrojnë. Me ndihmën e teknologjisë procesi mund të përmbyllet më shpejt e me më shumë transparencë.

“Sot janë mbi 5 mijë qendra votimi dhe është krejtësisht e mundur që teknologjinë që e kemi të përqendruar në qendrat e grumbullimit të votave, ta shpërndajmë në të gjithë Shqipërinë dhe ta bëjmë numërimin sapo mbyllet votimi. Ka ardhur koha të kalojmë te administrimi civil i procesit zgjedhor,” theksoi Manja.

Propozimi vjen një ditë pasi kreu i grupit parlamentar të PS, Taulant Balla, njoftoi se mazhoranca do të ndërmarrë nismën për ngritjen e komisionit për reformën zgjedhore, me qëllim modernizimin e mëtejshëm të proceseve elektorale në vend.

LEXONI GJITHASHTU:

• Komisioni i Ligjeve 1 minutë heshtje për gjyqtarin e vrarë, Manja: Kambanë alarmi 
• Manjani: Veliaj mund të kandidojë si i pavarur