Pulisic dhe Maignan vendosin derbin, Milan mposht Interin 1-0

Derbi i Milanos është fituar nga kuqezinjtë, të cilët mposhtën minimalisht Interin dhe u ngjitën në vendin e dytë në klasifikim ndërsa kampionati italian kryesohet nga Roma me 27 pikë.

Një gol i amerikanit Pulisic vulosi derbin e Madoninës ndërsa përballja në “Meazza” ishte tejet interesante, me raste të shpërdoruara, një penallti të humbur dhe një super Maignan.

Në tërësi, Interi luajti më mirë, duke provuar ta rrezikojë disa herë kundërshtarin, sidomos në pjesën e parë që u mbyll me rrjeta të paprekura.

Në fraksionin e dytë, Milan gjeti menjëherë avantazhin me Pulisic. Në minutën e 74’, zikaltrit kishin mundësinë e artë për të rikthyer ekuilibrat, por Calhanoglu gaboi nga pika e bardhë, falë pritjes së shkëlqyer të portierit Maignan.

Në vijim, asgjë nuk ndryshoi dhe Milan mori fitoren e radhës në derbi, ku Inter nuk fiton që prej prillit të 2024-ës. Në 6 ndeshje të fundit janë 4 fitore për kuqezinjtë dhe 2 barazime.

Sa i përket klasifikimit, në krye qëndron Roma, e cila mori fitoren e radhës ndaj Cremonese në transfertë.

Skuadra e Gasperinit po zhvillon një sezon fantastik dhe ka 27 pikë, 2 më shumë se Milan dhe Napoli që e ndjekin.

Të dielën, romanët fituan 1-3 me golat e Soule, Ferugon dhe Wesley Franca, ndërsa për Cremonese realizoi Folino.