Punonjësit e gjelbërimit në Vlorë protestojnë përpara Bashkisë, shkak shkrirja e drejtorive

Rreth 60 punonjës të Ndërmarrjes së Gjelbërimit dolën këtë të hënë në një protestë përpara Bashkisë së Vlorës.

Shkak për protestën është bërë shkrirja e dy drejtorive, asaj të Pastrimit dhe të Gjelbërimit, në një të vetme. Sipas punonjësve, kontrata e re i detyron ata të kryejnë edhe punët e pastrimit, ndërkohë që kërcënohen me largim nga puna nëse nuk i pranojnë këto detyra.

Punonjësit deklarojnë se, sipas kushteve të reja, duhet të jenë në gatishmëri 24 orë për situata të ndryshme, ndërkohë që theksojnë se nuk e kanë parë dhe nuk u është prezantuar zyrtarisht kontrata e re.

Ata shprehen se do të vijojnë protestën dhe nuk do të rikthehen në punë deri në arritjen e një marrëveshjeje. Sipas tyre, kërcënimi me largim nga puna është i pranishëm nëse nuk pranojnë kushtet e reja të kontratës.

Pas protestës para Bashkisë së Vlorës, ata kanë kërkuar një takim në Prefekturë ndërsa janë pritur nga Evis Allushi, e cila u shpreh se mbledhja do të protokollohet dhe se do t’i drejtohet Bashkisë së Vlorës për informacion zyrtar mbi situatën.

Prefektja garantoi se do ta ndjekë problematikën hap pas hapi.

Ndërkohë, punonjësit deklaruan se aktualisht ndodhen pa punë. Ata i kanë bërë me dije prefektes se nuk u janë dhënë pagesat për ditët e festave, ndërsa theksuan se nuk mund t’u kërkohet qytetarëve të paguajnë taksën e gjelbërimit në një kohë kur ky shërbim po shkrin.

Punonjësit e Gjelbërimit u shprehën se do të vijojnë protestën edhe në orët në vijim, por paralajmëruan se rrezikojnë të mbeten pa punë nëse nuk firmosin kontratën e re.