Putin i kërkon Gazpromit që gazi rus të shitet në rubla

Presidenti Vladimir Putin deklaroi të mërkurën se Rusia do të fillojë të shesë gazin natyror ne valutë ruse (rubla) për të gjithë ato vende, qe vendosen sanksione dhe ngrinë asetet duke kërcënuar rezervat e Bankës Qendrore ruse.

“Javët e fundit janë marrë masa të jashtëligjshme ndaj Rusisë nga disa shtete të Perëndimit duke ngrirë asetet ruse. Me këtë veprim, Perëndimi ka vënë në dyshim besueshmërinë e valutave të tyre. Kam marrë këtë vendim për të ndryshuar sa me shpejt valutën e pagesave në rubla për gazin natyror për ato vende që kanë qasje jo miqësore ndaj nesh”, tha presidenti rus.

Putin deklaroi se ndryshimet do të ndikonin vetëm valutën me të cilën do të kryheshin pagesat dhe se qeveria dhe Banka Federale Ruse duhet të mendonin brenda kësaj jave për një zgjidhje se si këto operacione financiare do zhvilloheshin në valutën ruse.

“Dua të nënvizoj se Rusia do të vazhdojë të furnizojë me gaz sipas nevojave dhe çmimeve të caktuara në kontratat e nënshkruara më parë. Këto ndryshime kanë të bëjnë vetëm me valutën me të cilën do të kryhen këto pagesa. I kërkoj qeverisë që t’i urdhërojë kompanisë ‘Gazprom’ që të bëjë ndryshimet e nevojshme në kontratat për gazin”, deklaroi Putin.

Gjatë muajit të fundit Monedha vendase ruse rubla është zhvlerësuar në nivele rekord. Kjo valutë ka rënë pasi Perëndimi vendosi sanksione të ashpra ekonomike dhe Kremlini vendosi kontrolle të kapitalit në përpjekje për të ndaluar rrjedhën e parave nga Rusia.

LEXONI GJITHASHTU:

• Zelenski thirrje për bisedime me Putin, Turqia ndërmjetëse e palëve
• Putin shpalos kërkesat ndaj Ukrainës në bisedën me Erdogan