Paneli Zgjedhor për Ankesa dhe Parashtresa (PZAP) ka pranuar pjesërisht ankesën e Listës Serbe dhe ka urdhëruar Komisionin Qendror Zgjedhor (KQZ) të certifikojë këtë parti për zgjedhjet e jashtëzakonshme që do të mbahen më 19 maj në katër komunat veriore të Kosovës: Mitrovicë e Veriut, Zveçan, Zubin Potok dhe Leposaviq.
Sipas vendimit të PZAP-it, është anuluar vendimi i mëparshëm i KQZ-së për moscertifikimin e kandidatëve të Listës Serbe, duke vlerësuar se kjo parti ka plotësuar kushtet ligjore për pjesëmarrje. Kandidatët e certifikuar janë Goran Rakiq për Mitrovicën e Veriut, Vuqina Jankoviq për Zveçan, Srdjan Vuloviq për Zubin Potok dhe Zoran Todiq për Leposaviq.
Megjithatë, PZAP refuzoi si të pabazuar apelin e Listës Serbe që lidhej me pretendimet për shkelje nga anëtarët e KQZ-së dhe hodhi poshtë kërkesën për të vërtetuar se vendimi i mëparshëm i KQZ-së shkelte nenin 45 të Kushtetutës së Kosovës.
Ky vendim i PZAP-it u jep mundësi kandidatëve të Listës Serbe të garojnë në zgjedhjet e jashtëzakonshme lokale, duke përfaqësuar kështu interesat e komunitetit serb në këto komuna.
LEXONI GJITHASHTU:
- Lista Serbe do të marrë pjesë në zgjedhjet e 9 shkurtit në Kosovë
- Ngrihet aktakuzë në mungesë për krime lufte në Kosovë
